Міністар абароны Украіны Рустэм Умераў заявіў, што ідэя стварэньня новага фармату належыць заходнім дзяржавам, якія прапанавалі дапамогу ў пабудове новай абароннай вытворчасьці, што належала б украінскім абаронным кампаніям.
«Партнэры зьвярнуліся да мяне з пытаньнем, ці могуць украінскія кампаніі пабудаваць вытворчасьць у іх дзяржавах, каб вырабляць найноўшую прадукцыю. Нашы партнэры гатовыя цалкам аплаціць вытворчасьць, і прадукцыя будзе накіроўвацца ва Ўкраіну так доўга, пакуль будзе працягвацца вайна», — растлумачыў ён.
Падчас дыскусіі гэтую ініцыятыву пашырылі, вынікае з тлумачэньняў Умерава, і зараз размова ідзе аб узаемных інвэстыцыях. «Паводле гэтай ініцыятывы ўкраінскія вытворцы могуць інвэставаць у дзяржавы-партнэры, а кампаніі зь дзяржаваў-партнэраў могуць будаваць свае мегафабрыкі ва Ўкраіне», — адзначыў міністар.
Гэта новая ідэя, якая яшчэ канчаткова ўзгадняецца. «Гэтая ініцыятыва ня мае афіцыйнай назвы, мы называем яе Рамштайн-ініцыятывай у пытаньнях абароннай вытворчасьці, але гэта — стратэгічны зрух», — выказаў упэўненасьць Умераў.
Ён ня стаў удакладняць, якія дзяржавы выказалі зацікаўленасьць у такім інвэстыцыйным супрацоўніцтве.
Форум